القائمة الرئيسية

الصفحات

🔥🔥الجزء الاول من كورس الفيس بوك ادز…🔥🔥

كورس إحتراف الفيس بوك ادز (facebook ads)
كورس إحتراف الفيس بوك ادز (facebook ads)

هديك كونتنت محترم باذن الله يليق بيك وبوقتك ويكون فعلا مستاهل الانتظار اللى بنتظره ده  ده وعدى ليك  نخش بقى ف المهم علطول عشان البوست طويل، ف البوست ده انا هتطرق لكل الحاجات اللى مفروض نعملها الاول قبل ما نفكر نجرى ونروح نعمل حمله ونشغل اعلانات

الاعلانات والترافيك والحاجات الحلوه ده خالص بتستهوانا كتير بس احيانا بننسى ان ف حاجات لو متعملتش الاعلانات ده مش هتكون ليها قيمه او فايده او نتايجها مش هتكون زى ما احنا حابين فالاول خلينا نحط الاساسات الصح اللى نقدر نبنى عليها حملات تكون ناجحه باذن الله

البوستات ده بتاخد منى وقت كتير وانا مش هخبى عليك حاجه - يعنى اللى هتقراه هنا هيكون كافى جدا انه يحققلك كل الارقام اللى انت عايزها واكتر كمان - مش معنى انه مجانى انك تكون فاكر انه ملوش قيمه او ان القيمه الحقيقيه ف الحاجات المدفوعه - مش شرط!

كل اللى بطلبه منك انك تركز وتقراه البوست ده او البوستات اللى جايه وانت رايق ومركز ويستحسن تقراه من الاب توب او الكومبيوتر بتاعك مش الموبايل عشان تعرف تركز وتاخد نوتس - لو بتتشات مع حد سواء ع الموبايل او مكالمه او ع اللاب خلص الشات بتاعك الاول وبعدين ابتدى - البوست مش هيطير بس لو قريته كروته كل اللى هييجى بعده مش هيبقى له لازمه

البوستات هتكون مربوطه ببعضها يعنى مش ينفع تسقط حاجه ف النص - احنا هنحاول نحط الاساسات ف الاول وف حاجات هنتطرق ليها زى الmindset وطريقة التفكير وحاجات كتير مهمه مينفعش تقول انك عارفها - حتى لو عارفها ذاكرها ع سبيل التذكيره - لحد الان انا بذاكر وبتعلم وهنفضل نتعلم طول ما احنا عايشين فتقبل ده ومتدايقش منه

البوستات ده او الكورس هيكون مركز اكتر ع تسويق منتجات او خدمات هتساعد العميل انه يتخلص من الم كبير - يعنى بالاخص العميل عنده الم بسبب مشكله معينه والمنتج بتاعك او الخدمه بتاعتك هتساعده يتخلص م الالم ده

يعنى بكرر - مينفعش تكون مش مركز ف البوستات ده او انك تكروت منها او انك تفكر انك عارفها - انا بقلك من دلوقتى عشان نيجى ف الاخر ونلاقى اعلى نتايج انت عايزها - لو ضمنتلى الحته ده هضمنلك نتايج كويسه مرضيه ليك باذن الله

اللى هتتعلمه هنا هو مبادىء تقدر تطبقها ع اى نوع بزنس وتسوق بيه لاى حاجه - مش هعلمك اخر تركات كمان شهر تقف وترجع انت تعطل - انا هعلمك اللى يقدر يمشيك ويخليك تعرف تسوق للمنتج او الخدمه بتاعتك بطريقه ناجحه لسنين جايه مهما تغيرت القوانين او اللوغارتميات - التكنيك هيفضل طول الحياه يتغير لكن اللى مش هيتغير هو المبادىء الاساسيه اللى عل اساسها نقدر نقول البزنس ده هينجح ويبقى ليه مستقبل ولا لا

حاجه اخيره: اللى هقوله كله تجارب عمليه مش كلام كتب او مقالات - كله عملى ١٠٠٪ وانا بطبقه بنفسى وبشوف نتايجه بصوره مستمره قبل ما انطق بيه يعنى اللى انا بعمله تيست دلوقتى مش هتكلم عنه - اللى جربته وجايب معانا نتايج هوه اللى هتكلم عنه

نبتدى ع البركه

قبل ما نتكلم ع الحملات عايزين نتكلم ع شويه مبادىء رئيسيه لو محطنهاش اول اولوليه مفيش اى حاجه هتجيب نتايج

اول حاجه: المنتج او الخدمه اللى عايز تسوقلها
انا هدى المثال ع كورس مثلا وهكمل بقية البوستات ع نفس المثال

قبل ما نفكر اننا نسوق للكورس ده لازم الاول نعرف الكورس ده بيساعد الناس تعمل ايه بالظبط؟

ونسأل نفسنا طيب هل الحاجه او الالم اللى الكورس ده بيساعد الناس تتخلص منها - هل الالم ده كافى؟ يعنى الم قوى مأرق ع العميل بتاعنا حياته؟

طيب سؤال تانى: هل المنتج او الخدمه بتاعتنا مثلا الكورس ده فعلا هيخليه يتخلص م المشكله او الالم ده؟ طيب هنفترض انه الكورس ده هيقدر فعلا يخليه يتخلص م الالم ده

ييجى سؤال تالت: طيب هل ف كورسات تانيه تقدر تساعد العميل انه يتخلص م نفس الالم؟

هفترض ان اه فيه وكذا كورس كمان

وهفترض الاسوأ كمان ان الكورسات التانيه ده احسن م الكورس بتاعى ونتايجها احسن

هنا هنقع ف مشكله: انك عقلك الباطن عارف انك بتسوق لكورس ف احسن منه بكتير وبيقدر يعالج نفس المشكله واحسن كمان - ازاى انت هتكون مقنع جداااا ف اعلاناتك وحملاتك وانت اصلا عارف ان الكورس بتاعك مش احسن واحد؟

يبقى هنا انا عايز اغير تركيزك ف الاول بدل ما تخش ع الحملات علطول - انك تشوف السوق بتاعك والكورسات اللى موجوده وبتحل نفس المشكله - اشترى الكورسات ده وخش وشوف البروسيس بتاعتهم واعرف هما ازاى بيعالجو المشكله احسن منك وهينور معاك سعتها لمض كتير تقدر تساعدك انك تفهم ازاى تحسن الكورس بتاعك قبل ما تسوقه؟

طيب ف سيناريو م اتنين هنا:
سيناريو #١: الكورس بتاعك لسه جديد ومش عارف كفائته لسه
سيناريو #٢: الكورس بتاعك قديم بس ف كورسات بتعالج نفس الالم وتحل نفس المشكله واحسن منه

نمسك اول سيناريو: ف الحاله ده اللى انت محتاجه انك تدى العملاء ده منحه زى scholarship كده يجربوا الكورس ويعرفوك النتايج وتشوف فعاليه الكورس بتاعك

لازم تشوف النتايج بتاعت الحاجه اللى بتسوقها وتشوف انها فعلا فعاله وبتجيب نتيجه وبتنفع الناس!!
لازم تشوف النتايج بتاعت الحاجه اللى بتسوقها وتشوف انها فعلا فعاله وبتجيب نتيجه وبتنفع الناس!!
لازم تشوف النتايج بتاعت الحاجه اللى بتسوقها وتشوف انها فعلا فعاله وبتجيب نتيجه وبتنفع الناس!!

طيب ليه؟ لان ده هينعكس ف المحتوى بتاعك - عمرك ما هتعرف تكون مقنع وانت اصلا مش مقتنع باللى بتسوقه

مش هتعرف تسوق صح لحاجه انت مش مقتنع بيها وعارف انها مش بتفيد الناس
ف سيناريو رقم واحد: ف حاله من حالتين:
الكورس بتاعك مش هيجيب نتايج
الكورس بتاعك هيجيب نتايج والناس مبسوطه

ف الحاله الاولانيه: معاناها انك مش مستعد لسه لتسويق الكورس ده - روح اشتغل ع الخدمه اللى بتقدمها وحسنها الاول وبعدين فكر ف تسويقها وكل مره بتحسن الكورس او بتعيده صياغته - ادى Scholarships لناس تانيه وشوف النتايج بتاعتهم

وافضل عيد ف البروسيس ده لحد ما توصل لنتايج مرضيه وتبقى من جواك كده عارف انك بتسوق لحاجه فعلا مفيده وبتجيب نتايج - لان ده هيقوى كل حاجه بعد كده وهيباااااااان جدا ف المحتوى بتاعك وفيديوهاتك والجمهور بتاعك هيقدر يشوفه

انت هتوقفنى هنا تقلى هو ده كورس فيس بوك ادز؟
هرد عليك واقلك اتقل كله هييجى بس ده اساسات - لو معندكش ثقه داخليه انك بتسوق لحاجه مفيده وبتجيب نتايج - هتبقى غالبا مضطر لتسويقها عشان محتاج الفلوس ومهما قلتلك هنا انت مش هتعرف توصل وتحقق نتايج كويسه لان عقلك الباطن رافض اللى بتعمله فخلينا نمشى بالترتيب السليم

طيب سيناريو رقم ١ لسه - الحاله رقم اتنين وهى ان الكورس بيجيب نتايج الحمد لله والناس مبسوطه وتمام

هنقدر نسوق بقى؟
اه بس ف حاجه واحده اخيره محتاجين نعملها قبل ما نبتدى ف التسويق وهى انك تعرف ايه الUSP

طبعا انا مقصدش الUSB  (حقا انها لالشه بخيسة الثمن)
انا اقصد USP - Unique Selling Propostion
يعنى بالمعنى الاصح ايه اللى بيميز الكورس بتااعك عن بقية الكورسات؟

هتقلى مفيش - تقريبا هوه هواه

هقلك بسيطه متقلقش - هديك استراتيجيه بسيطه جدا تقدر من خلالها تتفوق ع منافسينك حتى لو معاهم ميزايات اكبر منك بكتير وحتى لو معروفين عنك بكتير وحتى لو كمان مش معاك ميزانيتهم ولا عندك البراند الكبير زيهم

الاستراتيجيه ده انا عملتها من حاجه اسمها 2nd order consequences ومعناها بالاصح ان كل حاجه بتعملها ف حياتك بيبقى ليها توابع

وهشرحلك مثال سريع عليها قبل ما اكملك عشان تبقى فاهم ده ايه

لو انت مثلا رحت اشتريت تلفزيون جديد - معظم الناس فاكره ان تكلفته هى تمن التلفزيون اللى انت دفعته وانت بتشتريه
ده الfirst order

لكن التوابع اخطر بكتير من مجرد التمن اللى اشتريته بيه - لأنك دلوقتى اشتريت تلفزيون بشيىء وشوياه وعشان تبرر لنفسك التمن الكبير اللى انت دفعته ده لازم تحسس نفسك انت بتستفيد منه وبتستخدمه فعلا - يعنى لو انت مش من هواة الفرجه ع التلفزيون هتضطر انك فعلا تتفرج عليه عشان تحس ان فلوسك مرحتش ع الارض - صح كده؟

فهيبدأ يخلقلك عاده ياما كانت عندك بصوره بسيطه (كنت بتتفرج بس بسيط) - ياما مكنتش بتتفرج خالص هتضطر تتفرج عشان الفلوس ده متحسش انها راحت ع الارض

كمية الافات الساعات الى هتروح وانت بتتفرج ع التلفزيون - الساعات ده اتخدت من حاجه كنت ممكن تساعد تبنى asset او تبنى البزنس او تقرا كتاب يساعدك توصح لاهدافك اسرع فالتكلفه الحقيقيه اضخم وكارثيه عن مجرد تمن التلفزيون

ده شرح بسيط لل2nd order consequences

طيب انا شرحته ليه؟ عشان اعرفك انا ازاى استخدمت الاستراتيجيه ده انى اتفوق مع منافسين وازاى انت تقدر تعمل كده

اللى هتعمله انك هتفكر ف كل الالم اللى هييجى من حل الالم الكبير - يعنى الالم اللى ممكن ييجى بعده

خش عليا بمثال عملى عشان انا تهت:
ولنفرض ان الكورس بتاعك بيعلم الشباب الانجليزى وبيعرفهم ازاى يتحدثوا بطلاقه

طيب الكورس بتاعى تمام والشباب اللى طالعه متعرفش تفرقهم عن الامريكان وبيتكلموا كويس جدا

فكر بقى ايه الالم اللى ممكن ييجى من بعد ما هما يتعلموا انجليزى؟ امممم والله هما تقريبا خدوا الكورس ده عشان يقدموا بيه ف شركات معينه بتديهم مرتبات كويسه وculture و environment حلوه -- طيب الشركات ده محتاجه

حاجه تانيه interpersonal skills مثلا بحيث انهم لو خدوها هتزود من فرص انهم يتقبلوا ف الشركات ده؟

غالبا اه - طيب مين احسن حد يقدر يدى كورسات الinterpersonal skills مثلا ده ف السوق؟

كذا وكذا - طيب هل ممكن تكلمهم وتاخد منهم lisencee م الكورس بتاعك وتحطه مع الانجليزى بحيث انهم يتعملوا الاتنين؟

يبقى انا كده اولا انا فهمت هو الناس عايز توصل لايه وهما خدوا الكورس بتاعى عشان يوصلوا مثلا انهم يعرفو يقدموا ف الوظيفه ده - طيب لقيت ان ف الم تانى وانهم محتاجين يتعلموا كذا حاجه كمان - ياما هنجيب الناس اللى بتدى الحاجات ده ويبقو شركاء مثلا وياخدوا نسيه وبكده معاك كورس بيجيب نتايج اعلى م اى منافس ليك

طيب انت مممكن متقفش هنا - ده انت ممكن تروح للشركات ده وتفهم كل الskills اللى هما محتاجينها وتعرفهم انك هتقدر تجمع كل الskills ده ف كورسات بحيث انهم ضامنين ان الناس اللى هيتخرجوا من عندك هيبقى عندهم كل المؤهلات اللازمه للوظيفه

تخيل وانت بتسوق لحاجه بالقوة ده - وانك مش مجرد بتوفرلهم الوسيله للوظيفه ده انت بتاخدهم من مكانهم Current Situation للمكان اللى عايزين يوصلوله وهوه الوظيفه Desired Situation -- يااااااه فاكرها؟

انا هنا بديك مثال عشان افهمك - انت مش محتاج تعمل كل ده - فكر ازاى انك تحس المشكله اللى هتنتج من بعد ما تحل المشكله الاساسيه

مثال تانى: كورس تخسيس - الناس هتاخد الكورس وتخس - طيب بعد ما تخس شويه - ايه المشكله اللى هتقابلهم بعد كده؟

غالبا بعد ما يخس هيعجبه الموضوع وهيبقى عايز يوصل لنتايج احسن - حد يساعده ف تمرينات advanced مثلا عشان يوصل لbody fat معين يبقى لو شوفت كوتش او مدرب وعرضته مع الكورس انت كده متميز اكتر عن بقية كورسات التخسيس وتقدر توضح ده ف اعلاناتك ونسبة فعاليه الحملات ونجاحها تبقى اعلى بكتير - وصلت كده؟

يبقى من هنا بنستنتج اول حاجه وهى ان الماركتنج مش اهم حاجه واهم حاجه انك يكون عندك منتج او خدمه بيجيبوا نتايج

وبعدها ازاى تقدر تتفوق ع منافسينك لان الناس هتشوف ان حتى البراند الكبير مش عنده اللى عندك فهيشتروا منك لانك هتتحلهم مشاكل اكتر والاستراتيجيه تطبيقها سهل انت مجرد بس محتاج انك تقعد وتفكر وتسأل العملاء بتوعك عن المشاكل اللى بيواجهوها وده هيساعدك كتير

يبقى احنا هنا وصلنا:
معاك خدمه او منتج بيجيبوا نتايج
وعرفت كمان ايه اللى بيميز المنتج او الكورس بتاعك عن بقية الكورسات للمنافسين

عملت ده - كده انت تمام. هنمسك بقى شويه ف جزء الmindset عشان مهم

طول عمرى اتعلمت انك لو عايز تحقق هدف بتحطه ف دماغك وبتكتبه وتقعد تحلم بيه وبعدين تعمله breakdown وتشوف ايه الاكشنز اللى مفروض تعملها عشان توصل للهدف ده وتبدأ تعمل الاكشنز ده

والحقيقه انى كنت مصدق كده لفترات كبيره ف حياتى وده الكلام النظرى اللى مفيش نقاش عليه بس الحقيقه والتجارب واللى عيشته والفشل اللى فشلته والنجاحات اللى عملتها بفضل الله علمتنى شويه حاجات هعرفهالك دلوقتى

اولا ان الكلام ده نظرى فقط وليس عملى ومن الاخر كلام غلط ومش هيوصلك لحاجه

ف ناس هتسمع الكلام ده وهتعملى ان فلو وبلوك ومش هتكمل حتى البوست - مش هلومك لو عملت كده - ف الاول والاخر انا كتبت فوق انى هكتب من تجاربى الشخصيه

اللى عيشته اثبت العكس وركز اوى ف الجملتين اللى هقلهم دلوقتى وحطهم حلقه ف ودنك لانهم هما فعلا اللى هيعملوا التغيير الحقيقى مش انت تحط هدف قصادك وتحاول توصله

وقبل ما اقلهم عايز اقلك عل حاجه مش هنختلف عليها وهى ان "النتايج والليفل اللى انت وصلتله دلوقتى نابع من الشخصيه اللى انت عايشها دلوقتى والاكشنز وطريقه حياتك دلوقتى"

بمعنى اصح النتايج اللى بتشوفها ف شغلك دلوقتى جايه من الخبرات بتاعت الشخصيه اللى انت عايشها دلوقتى

طيب ركز اكتر ف اللى هقوله:

"النتايج والاحلام والطموحات والاهداف بتاعت المستقبل محتاجه منك انك تعيش وتلبس شخصيتك ف المستقبل بس من دلوقتى"

يعنى ايه الكلام ده:

فاكرين لما كنت شرحت الCurrent Situation والDesired Situation

الوضع الحالى ليك ولشخصيتك وكلامك واسلوبك وطريقة معيشتك وتجاربك وخبراتك "الحاليه" هى المسؤوله عن النتايج "الحاليه" اللى انت شايفها ف حياتك والبزنس بتاعك

لو انت عايز تحقق الهدف اللى ف دماغك لازم تعيش بشخصيتك المستقبليه من دلوقتى

طيب نوضح الكلام ده اكتر:

انت حاطط لنفسك هدف كبير عايز تحققه - صح؟

اسأل نفسك سؤال صريح وواضح وخليك صادق مع نفسك: هل طريقة تفكيرك تؤهلك انك تحقق الهدف ده؟ طريقة معيشتك؟ طريقة شغلك؟ طريقة استثمارك ف نفسك؟ حالتك الجسمانيه؟ هل انت فعلا عملت optimization لكل حاجه ف حياتك عشان تساعدك انك تنفذ كل الخطط اللى هتوصلك لهدفك؟ هل انت حاطط نفسك ف احسن بيئه مناسبه تخليك مركز وعندك وضوح لهدفك؟

امثله: - بتنام ف نفس المعاد كل يوم وبتصحى ف نفس المعاد كل يوم؟ متنظم ع كده؟ بتعمل ده من الاراده اللى جواك ولا بتعمله عشان مغصوب عليه؟

اكلك صحى؟ متنظم عليه؟

بتلعب رياضه؟ منتظم عليها؟

بتستثمر ف نفسك وتقرا كتب وتاخد كورسات؟ ولا مقضيها ع سوشيال ميديا…

عامل تراكينج لكل حاجه ف حياتك وعارف كل دقيقه بتروح فين؟ ولا عايش حياتك كده زى ما هى ماشيه

بتعرف تقول لأ لكل حاجه هتعطلك عن اهدافك او هتشتتك؟ ولا بتتكسف وبتضطر تقول اه لكل الناس حتى لو هييجى ع حساب اهدافك؟

الحقيقه ان ناس كتير مش واخده بالها وقتها بيروح فين وبيبقى عندها اهداف وفعلا الرغبه حقيقيه ومحتاجين يحققوا الاهداف ده - لكنهم عايشين ف شخصيه عمرها ما هتوصل لاى حاجه ف حياتها

بتنام ف اى وقت - بتصحى ف اى وقت

بتاكل اكل مش صحى فجسمها علطول تعبان

مش عامله تراكينج لاى حاجه وايامها كلها زى بعضها بتيجى اخر الشهر تقول الشهر راح فين

مفيش معايير ثابته او مبادىء واسس ع اساسها بترجعلها لما تاخد اى قرار

مفيش رياضه ووقتهم كله ضايع ع سوشيا ميديا

بيتكسفوا يقولوا لا وبيضطروا انهم يقبلوا كل حاجه حتى ع حساب اهدافهم وشغلهم

مضيعين وقتهم ع سوشيال ميديا ومش عارفين ايه المهم من اللى مش مهم

نتيجه انهم مضيعين وقتهم ع سوشيال ميديا بيشوفوا ناس كتير بتعمل حاجات كتير فبيحاولو يعملوا زيهم فبالتالى عندهم زيرو تركيز - تركيزهم ضايع

المشكله الاكبر انهم مش بيبقوا شايفين ده…

حقيقى الموضوع كارثى والكارثى فيه انه مش واضح يعنى مش هتقدر تشوفه غير لما تحلل كل حاجه ف حياتك

فهو بيقلك انا بشتغل من اول ما بصحى لحد ما انام - انا بحاول اقرا واخد كورسات واطور من نفسى ع قد ما اقدر

انا نفسى اعمل حاجات كتير بس الوقت مش مساعدنى ومش ملاحق و و و والنتيجه انه مش بيوصل….

طيب المفروض اعمل ايه؟
هقلك…
اولا الهدف بتاعك لازم يكون كبير - انا بتكلم كبير جدااااااا
مايكروسوفت كان هدفهم ان كل بيت يكون فيه جهاز كومبيوتر - الوقت اللى قالوا فيه الكلام ده - كان الكومبيوتر تمنه مليون دولار فكان تقريبا مستحيل

ليه هدف كبير؟

لان لو الهدف صغير - مش هيديك الطاقه الكافيه اللى تخليك تكمل ف الاوقات الصعبه

طيب انا عندى هدف كبير وطموح عالى… اوصله ازاى؟

هشرحلك: انت محتاج تبص للهدف ده وتسأل نفسك هو شخصيتى المستقبليه اللى باذن الله هتحقق الهدف ده شكلها عامل ازاى؟ وابدا خش ف اعماقها اوى وهديك مثال

شخصيتى المستقبليه القادره انها تحقق الاهداف ده:
بتنام امتى؟ بتصحى امتى؟ بنام بشكل منتظم؟
طريقة شغلى عامله ازاى؟ ايه اللى مفروض اشتغل فيه وايه اللى مفروض ارفضه حتى لو اتعرض عليا عروض مغريه كتير؟
اسلوبى ف الكلام مفروض يكون عامل ازاى؟
اكلى شكله عامل ازاى؟
بضيع وقت قد ايه ع سوشيال ميديا؟
بقرأ كام كتاب ف السنه؟
انتظامى ف الرياضه؟
مين اكتر ناس مفروض تكون قريبه ليا وبتكلم معاهم؟
بحضر كام ايفنت فى السنه؟ وهحضر ف ايه؟
مفروض اتفرج ع كورسات ايه ف مجالى؟
ايه اهم ٣ حاجات ف حياتى؟ ايه كل حاجه ممكن اضحى بيها ف سبيل انى احافظ ع ال٣ حاجات دول؟
مدى سلامك الداخلى انك تضحى بكل حاجه حتى لو بتحبها عشان ال٣ حاجات المهمين ف حياتك؟

وتبدأ تقارن بين شخصيتك "الحاليه" وشخصيتك "المستقبليه"
ف كل حاجه وتظبط حاجه حاجه من الفروقات بين الاتنين

يعنى مثلا لو ف ٢٠ فرق بين شخصيتك الحاليه وشخصيتك المستقبليه هتظبط فرق فرق بحيث انك متأكد بعد ما تظبط ال٢٠ كلهم - هى كلها مسألة وقت وهتوصل لهدفك وتحققه وتكسحه كمان

لان وصلت بشخصيتك للشخصيه اللى تقدر فعلا تحقق ده

يعنى اللى اقصد اقوله كخلاصه هو انك لما تحط هدف لنفسك متفكرش ف الهدف كهدف واكشنز مفروض تاخدها عشان توصل للهدف - اسأل نفسك السؤال ده: هل شخصيتى بطريقة معيشتى بكل حاجه هتؤهلنى انى اوصل للهدف؟ غالبا لا

وبعديها ارسم صوره واضحه المعالم للشخصيه اللى مفروض تعيشها واللى هتأهلك انك توصل لاهدافك وطموحاتك وبعد ما ترسم الصوره ده - قارن بين الصورتين وابدأ ظبط حاجه حاجه - تأكد انك بعد ما تظبط وتقدر انك تعيش حاليا بشخصيتك المستقبليه - هتبقى مسألة وقت مش اكتر وانت ثقتك ف نفسك هتكون عاليه جدا وهتعرف فعلا توصل!

بعدها اعمل لنفسك الSuccess Reminders وهتقراها كل يوم - عباره عن نقط بتوضح الفروقات بين الشخصيتين الحاليه والمستقبليه اللى فعلا هتوصلك لاهدافك وانا عشان اساعدك - هكتبلك الSuccess Reminders بتاعتى اللى بقراها كل يوم - انا كاتبها لنفسى فهترجمهالك انى كاتبها لنفسى وانا عايزك تكتبها لنفسك

نام واصحى ف نفس الميعاد كل يوم - ٦ ايام ف الاسبوع - حذارى انك متلتزمش
اكلى لازم يكون صحى وجاهز م اليوم اللى قبله - ٦ ايام ف الاسبوع - حذارى انك متلتزمش
وقت الجيم مينفعش يزيد عن ساعه ف اليوم - ٦ ايام ف الاسبوع - حذارى انك متلتزمش
اى حاجه خلافا عن حالات الطوارئ - لازم تكون متخططه كويس ومحطوطه ف الكالندر عندى واى شيىء هيحاول يعوق ده سواءا اشخاص او قرارات بخلاف الطوارئ هقوله لا
تاسكات النمو اللى تكبر البزنس مفروض تاخد ٧٥٪ من وقتى والباقى ٢٥٪ من وقتى ولو المعادله ده اختلت - معانا انى بدير البزنس بتاعى غلط
اللديرز الناجحين مبيضيعوش اكتر من نص ساعه مكالمات ف التلفون
التطوير المستمر هو الوسيله الوحيده انى افضل ف القمه
لو فقدت تركيزى عن اهدافى وطموحاتى - كل التاسكات والدواخل اللى بعملها هتكون زباله وده معناها ان النتايج هتكون زباله ومشتته
الScreen time ع موبايلى لو تخطت الساعه يوميا - معناها انى مش منظم
الاجتماعات فى الشغل لازم تكون خليط م النظام وعدم النظام لان الاتنين مهمين
لو ملتزمتش بالشخصيه المستقبليه وضحيت بكل حاجه عشان اهدافى وطموحاتى - اهدافى وطموحاتى هتبقى هى التضحيه لان مفيش واحد بيملك كل حاجه
الاستمراريه هى اللى بتحقق النجاح - اول واكبر سبب ف الفشل هو عدم الاستمراريه واول سبب ف عدم الاستمراريه هو انى نسيت اهدافى وطموحاتى عشان كده هقراهم بشكل يومى وهتابع الدواخل والاكشنز اللى باخدها بشكل يومى من خلال الكالندر بتاعتى
غالبا الرحله هتكون مؤلمه وشاقه - لكنى هتعلم ازاى اتلذذ بالالم ده عشان ده بيخلينى شخص اقوى كل يوم (دايما افتكر ان اللديزر اللى نجحوا نجاحات عظيمه كانوا بيعتمدوا ع الالتزام مش التشجيع)
اهدافى كلها بعيده المدى - عشان كده انا برفض كل حاجه فيها نجاحات قصيره لو هتيجى ع حساب اهدافى بعيده المدى وهبعد عن كل حاجه بتدينى dopamine سريع
متنساش ان كل حاجه ف حياتى هى بفضل الله
قرايه النقط ده كل يوم الزامى مش اختيارى - اياك والتخاذل

ده النقط اللى انا كاتبها لنفسى وبقراها بشكل يومى عشان اخد خطوات انى اقرب م شخصيتى المستقبليه اللى مفروض اكون فيها لو انا فعلا عايز احقق الاهداف بتاعتى

فانا بنصحك بشده تعملك انت كمان نقط وتقراها بشكل يومى لان اللى هيوصلك لاهدافك هو شخصيتك المستقبليه اللى قايمه ع الالتزام والاكشنز والاستمراريه.

انا حبيت ادى المقدمه ده قبل ما نتكلم ف اعلانات ونتكلم ف اى حاجه لان كل اللى هنتكلم عليه بعد كده هيعتمد انك تكون ملتزم وتاخد خطوات مدروسه وتفكر بعقليه مختلفه فلو ظبطناها من دلوقتى هنرتاح قدام

احنا ف البوست ده بنهيأ عقليا انك تبدأ خطوات التغيير وطريقة تفكيرك تتغير وتبدا تاخد خطوات نحو شخصيتك المستقبليه اللى هتخليك عندك الوقت والبيئه وكل حاجه توصلك للى انت عايز توصله

البوست مش اكاديمى ومفهوش الادرينالين بتاع يلا نطلع حملات ونكسب ونعمل $$$ بس اللى اتقال هنا اهم مليون مره من الحملات نفسها لانك هتوصل للشخصيه اللى مفيش حاجه هتوقفها باذن الله واللى تقدر تبص للصعاب بمنظور مختلف تماما وتاخد قرارات مختلفه وتعيش حياه مختلفه

البوست القادم باذن الله هنشرح شويه اسس كده بتفرق مابين المعلن الناجح والمعلن الغير ناجح وازاى تعرف تفكر كمعلن ناجح حتى لو عمرك ما عملت حملات قبل كده وبعديها هنخش ف الشغل العملى

اتمنى تكونوا استفدتوا - بالتوفيق
هل اعجبك الموضوع :

تعليقات

العناوين الموجودة داخل الموضوع