القائمة الرئيسية

الصفحات

🔥🔥الجزء الثانى من كورس الفيس بوك ادز…🔥🔥

كورس إحتراف الفيس بوك ادز (facebook ads)
كورس إحتراف الفيس بوك ادز (facebook ads)

الجزء الأول مهم ليك بص عليه من هنا : الجزء الاول من كورس الفيس بوك ادز


النهاردة هنتكلم عن

  • اعلانات الفيس بوك وتعريفها 
  • ميكانزيمية الفيس بوك لعرض الاعلانات للمستخدمين
  • اهمية الاعلانات المدفوعه

  • الارقام والداتا والفرق بين المعلن الناجح والمعلن الغير ناجح

نظره ف ما وراء المطبخ - هعرفك ازاى الناس ده بتفكر وع اى اساس بيقفلوا الحسابات وليه وهجاوبك ع حاجات كتير مكنش ليها معنى هتسهلك الدنيا وتخليك تستغلها انك تبنى ثقه بينك وبين فيس بوك لضمان استمراريه
قبل ما ابتدى حابب انوه ان البوست ده مش عملى لسه بس الاساس اللى بحطه ده مهم جدااااا لو اهملته وكملت بقية السلسله مش هتعرف تتصرح صح - ياريت تتعب نفسك معلش وتقرأ البوست لان كل حاجه مبنيه ع بعضها - انا محدد السلسلة كلها وكل بوست هكتب فيه ايه من قبل ما ابتدى اصلا فمش ماشى بالحب فتأكد ان كل حاجه ليها مغزى حتى لو انت مش شايفه دلوقتى بس كمل معايا واقرا وتمعن وذاكر ده عشان الاساسات ده هتفرق معاك جدا قدام وانت بتاخد قراراتك وانت ف ارض الملعب - تمام؟


  • اولا: تعريف اعلانات الفيس بوك

هى اعلانات دعائيه بتساعدك انك توصل توصل للعملاء بتوعك ع منصه من اكبر منصات السوشيال ميديا ع مستوى العالم وبتظهر ع شكل بوستات عليها علامه Sponsored او ممول بتظهر ف اشكال مختلفه واماكن مختلفه زى الNewsfeed - Right side column - messenger - instagram - audience network وهكذا.

الفيس بوك ده قبل ما يكون منصه للتواصل الاجتماعى فهو ف الحقيقه بزنس ١٠٠٪
اللوغارتميات بتاعت الفيس بوك مصممه انها توصل البوستات المموله والاعلانات بشكل كبير جدا وتقلل الاورجانيك ريتش اللى مش ممول باقصى درجه عشان يجبروا كل الناس انها تتجه للاعلانات المدفوعه بشكل كبير.
طيب بيظهر ع انه اشكال؟ بيظهر ف اشكال مختلفه هنسرد بعضهم هنا
Image ads, Video ads, Carousel ads, Slideshow ads, Collection ads, Instant Experience ads, Lead ads, Dynamic ads, Stories ads.

طيب سؤال: هل هنحتاج كل انواع الاعلانات ده؟ اكيد لا - وهو الاجابه بتختلف ع حسب نوع البزنس بتاعك وبالنسبة للاعلانات - ايه بقى انواع الحملات؟
Brand awareness, Reach, Traffic, Engagement, App installs, Video views, Lead generation, Messages, Conversions, Catalog sales, Store traffic.
من اسمها تقدر تقول الحمله ده وظيفتها ايه.
الكلام ده لحد دلوقتى جميل - بس عايزين نفتكر بس اهمية انك طبقت اللى قلته ف البوست الاول واهتميت ان المنتج بتاعك يكون فعلا فيه value ومميز ومفيد للعميل وعرفت ازاى تتفوق ع منافسنك انك تحل مشاكل اكبر للعميل بتاعك لان ده هيخدمنا كتير واحنا جايين.

نخش بقى ف نقطه ازاى الفيس بوك بيعرف العميل بتاعك؟اللوغارتميات بتاعت الفيس بوك بتراقب كل حركه بتعملها ع الفيس بوك وبتحط حاجات زى tags بالاكشنز اللى انت بتاخدها وع اساس ده بتبدأ تحدد اهتمامتك والحاجات اللى بتتفاعل معاها وده بيكون مربوط بلوغارتميات الاعلانات عشان يظهرلك الاعلانات اللى تكون فعلا قريبه من اهتمامتك والفيس بوك ف تطوير مستمر للوغارتميات ده عشان يقدر يوصلك اعلانات لمنتجات وخدمات تكون انت فعلا محتاجها.
طيب جميل جدا يعنى معنى كده ان فيس بوك عارف كل واحد مهتم بايه امال انا ليه عمال اشوف ناس كتير بتسأل ع الاستهداف ومشاكله ومش عارفين يوصلوا للعميل بتاعهم وبيشتكوا؟ سؤال منطقى جدا - وهجاوبك دلوقتىده بيرجع لاسباب كتير اوى بس اهمها هو ان ٩٠٪ م الناس اللى بتشتكى من مشاكل الاستهداف بتكون بسبب حاجات تانيه غير الاستهداف نفسه - يعنى بيكون المشاكل ف المحتوى او انهم زات نفسهم مش عارفين بيكلموا مين او انهم بيحاولوا يبيعوا لكل الناس بدل ما يحاول يضيق دايره العملاء بتاعهم يحاولوا يكبروها لاكبر حاجه عشان ميسيبوش حد مبيعيوش ليه.

طيب ثانيه متكملش: هو غلط انى محاولش ابيع لكله؟
ع الورق الكلام النظرى والمقالات - الطبيعى انك عايز تبيع للعالم كله - بيع للكره الارضيه كلها بس الحقيقه انك مش هتعرف تعمل كده ولو حاولت تعمل كده رسالتك واعلاناتك هتبقى ضعيفه لانها مش هتبقى محدده لناس معينه وانت عايز تكون دقيق جدا - من الاخر اللى انت عايز العميل بتاعك يحسه لما يقرا اعلاناتك انك بتكلم هوه بنفسه كأنك بتوصفه بالمللى - كأنك عايش معاه وعارف كل حاجه عنه - عارف بيحس بيه والالم اللى المشكله مسببهوله مأثر ازاى ف حياته والنتايج اللى بتحصل بسبب ده - كل حاجه كل حاجه ولو عملت كده هيبقى اعلانك ناجح

طيب سبنى اسألك انا سؤال منطقى: تفتكر انك تقدر باعلان واحد توصف العالم كله مظبوط؟
اكيد لا - لان الناس كلها مختلفه فمثلا لو قلنا اننا بنكلم جمهور مثلا مليون واحد
ايه احتماليه ان يكون ف ناس عندها نفس المشكله ونفس الظروف ونفس الالم ونفس كل حاجه؟ اكيد مش كتير صح يعنى اكيد مش المليون يعنى مثلا ممكن نقول ٥٠ الف منهم عندهم نفس الظروف
لو عرفت انت انك تلعب عال٥٠ الف دول وعملت اعلانات بتكلمهم هما بس - هيبقى سهل جدا بالنسبالك انك تبيع ليهم كلهم او لمعظمهم وساعتها هتبقى حملتك نجحت
ايه ده؟ يعنى مثلا من مليون واحد انا ممكن اتوقع ٥٠ الف يكونوا هما اللى الاعلان بتاعى بيكلمهم - بص الرقم ده انا هعرفك ازاى تحسبه بالمللى - احنا مبشنتغلش اعلانات الفيس بوك بالحب - هعرفك ازاى تحسب الجمهور المثالى بتاعك م عدد الجمهور الكلى يعنى هتبقى عارف ف الاستهداف بتاعك لو الفيس قلك معاك potential مليون هتعرف ان ده مثلا معناه ٥٠ الف وازاى احنا نوصل لل٥٠ الف دول بسرعه بس خلينا دلوقتى نكمل ومنتششتتش.

طيب هييجى سؤال منطقى: انا ليه مدرسش كل ٥٠ الف مع بعضهم واحاول اعمل اعلان يكلمهم هما بحيث انى هعمل اعلان لكل ٥٠ الف او بمعنى اصح كل مجموعه م الناس عندهم نفس الظروف ونفس الالم ونفس المشكله
سؤال منطقى وهجاوبك عليه: الموضوع ببساطه مش هينفع لسببين:
اولا: ان ممكن منتجك او خدمتك متكونش مخصصه انها تساعد كل المليون وتكون افيد لشريحه معينه منهم وده غالبا اللى بيحصل
ثانيا: لان بردو ع النظرى والورق ممكن تعمل كده لكن مفيش حد مننا عنده الوقت الكافى ان يدرس كل شريحه من شرايح الجمهور بالشكل ده فغالبا بنحاول نركز ع الشريحه الاهم بالنسبالنا وبنسيب الباقى وده مفيهوش اى مشكله

طيب انا ازاى اكتب اعلان يوصل للجمهور المثالى بتاعى - انا بدأت افهمك بس مش عارف اطبق ازاى؟بص هو انا كنت عامل ٢ لايف قبل كده ف المحتوى وهرجع الخصهملك واكتبهملك ف بوست واحد بالخطوات يعنى قصه انك تكتب محتوى قوى ده هحلهالك ف بوست واحد ووعد هتشوف نتايج مختلفه خالص بس خلينا نوصل لسعتها - غالبا ده هيكون البوست ده ٥ او ٦ فخليك ماشى معايا خطوه بخطوه وهنتكلم ف كله والاستهداف والحاجات الحلوه ده كلها

دلوقتى بقى عايزين نتطرق للفرق بين المعلن الناجح و المعلن اللى بيقعد يلف ويدور كتير ومش بيوصل لحاجه…قبل ما هتكلم ف الجزئيه ده حابب انوه ع شويه حاجات - المجال بتاعنا ده واسع جدا وملهوش حدود وناس كتير بتتكلم فيه - المشكله ان مش كل الناس ده فعلا فاهمه والنتيجه اللى بتحصل ان بلاقى ناس مثلا بتتكلم ف chatbot وناس بتتكلم ف فانلز وناس بتتكلم ف حملات الautomation والwhatsapp وشغل الAPIs بتاع كل بلاتفورم وقصص كتير اوى معظم (مش هقول كله لان التعميم غلط) بيكون ياما فعلا حد شاطر وبيكبر ف شغله ياما بيكون حد مش شاطر ولا حاجه بس بيحاول يفرد نفسه انه معاه تركات محدش غيره عارفها - طيب نتيجه لاى حاجه من الاتنين دول الناس اللى بتبتدى بتتظلم لانها بتفتكر اولا انها محتاجه تتتعلم كل الحاجات ده عشان بس تعرف تبتدى وده ملوش اى اساس من الصحه.

تانى سبب: ان الناس اللى بتتكلم فالحاجات ده مبتنوهش عن الاساسات اللى بتتبنى عليها العماره اللى لو متحططش صح العماره ده هتقع لا محاله
عشان كده احنا بدأنا ف الاول بجزء الmindset وهنكمل عليه شويه البوست ده بين المعلن الناجح والغير ناجح وازاى تفهم الفيس بوك وتفهم الناس ده بتفكر ازاى عشان تعرف تاخد خطوات مدروسه وتبقى عارف ايه قبل ايه، فنصيحتى ليك متحاولش تقلد كل حاجه بتشوفها لان معظمهما بيكون fake ومش بيجيب نتايج او نتايجه ليس لها اى قيمه حقيقيه - زى قصص التفاعل والايكات والكومنتات وصرفت جنيه وجبت مليون ريتش - الحقيقه ان الحاجه الوحيده اللى هتلاقى بركز عليها هنا هى انت صرفت كام وجبت كام والcustomer satisfaction والLTV (Lifetime value) وهنشرح الحاجات ده ف وقتها بس اللى اقصده ان…اعلانات الفيس بوك بسيطه جداااااااا، بس ع شرط - لو قدرت انك تمسكها كبروسيس مش كحظ - لو ماشى ع خطه وframework وعارف الsteps بتاعتك ايه ولو حصل ايه هتعمل ايه - ف شهر واحد هتكون عندك خبره كويسه - كلام ده هيصدم ناس كتير بس مش شايف اى داعى انى اضخملك حاجه متستاهلش التضخيم ده كله عشان افرد عليك عضلاتى - الموضوع بسيط لو خته كscience وتجارب بتشوف النتايج بتاعتها وع اساسها بتحدد خطوتك الجايه وف سلسلة البوستات ده هنحاول نبسطلك الموضوع عشان هو فعلا بسيط ونعرفك ازاى تمسك حملاتك زى العالم اللى بيعمل تجارب وبيشوف النتايج بتاعتها وع اساسها بيبقى عارف هو مفروض يعمل ايه تمام؟

احنا بدأنا خلاص نخش ف الفرق بين المعلن الناجح والغير ناجح تعالو بقى نفصص الاتنين شويه عشان تاخد بالك ولو حسيت بان بيجيلك اعراض من الاتنين تعرف ازاى تظبطها
  • هنمسك الاول المعلن الغير ناجح واللى نفسه قصير ومش بيوصل لحاجه
المعلن الغير ناجح بيبقى داخل بطريقة تفكير عكس اللى كاتبنها ف البوست والاعلانات بالنسباله عباره عن انه يرمى حاجات كتير ويشوف هو وحظه، بيحطوا محتوى يتقرى انه اعلانات وبيبقى واضح جدا مش بيتقرى انه بوست عادى (الناس بتكره تشوف الاعلانات وكل ما كان المحتوى بتاعك مكتوب بطريقه كانه صديق كاتبه لصديقه كل ما كان اعلانك ناجح) لكن المعظم بيحط اعلانات بتبقى واضحه اوى انها اعلانات ومش بتكون واضحه ولا فيها CTA (Call to action)

مش عندهم بروسيس وخطوات بيمشو عليها ف الحملات والاستهداف وكتابه محتوى الاعلانات والموضوع بيكون عباره عن حاجات بيجربوها من غير ماتكون محطوطه ف خطوات، مش عارفين مفروض يطلعوا كام حمله وليه وايه الobjective لكل حمله وليه بطلع ده ومبطلعش ده ومش عارفين كام adset وكام اعلانات والميزانيه لكل حاجه ايه وليه بعملها كده وقد ايه الجمهور وازاى وليه كل حاجه بتكون مجرد ضرب عشوائى مش خطوات وframework ماشيين عليه، بيكونوا عاطفيين جدا - بيبقى عايزين اول حمله يطلعوها تطلع فلوس ولو مطلعتش فلوس بيقفلوها كلها ومش بيقروا الداتا فيها ويشوفوا المشكله فين لا ده ياما الحمله تكسب ياما نقفلها ونكرر العمليه من اول وجديد وبسبب انهم مش ماشيين ع خطوات فبيكون انهم يوصلوا شيىء صعب جدا، ماشيين ف حملاتهم زى اللى بيرمى حجر النرد - مش عارف هيتوقع ايه ومش عارف مفروض يعمل ايه ف كل حاله ممكن تطلعله، بيخافوا بسرعه وبسبب انهم مش عندهم خطوات واضحه لكل نتيجه ممكن تطلع فهما بيديروا حملاتهم ع حسب احساساهم ف اليوم ده يعنى لو مودهم حلو ومستقرين نفسيا كده ومبسوطين ف اليوم ده فهما مممكن يسيبوا الحملات شغاله تجيب داتا لكن لو يومهم وحش ومش ف مود حلو ف اليوم ده فممكن يطربقوا الدنيا كلها ويوقفوا كل الحملات ويبنوها من اول وجديد - مفيش اى science - كله ماشى ع حسب مودهم ف اليوم ده - ده خطر جدااا

معندهمش استمراريه ونفس طويل - الفيس بوك والحملات وكل الجو ده بياخد خطوات والخطوات ده محتاجه اكشنز وانك تراقب النتايج اللى بتطلع وتدون كل النتايج وبعد ما تدون النتايج تعمل التجارب اللى بعدها وتشوف النتايج وتدونها وتقرا النتايج وتستفاد منها وع اساسها تحدد خطوتك الجايه والبروسيس ده بتحتاج وقت طويل ونفس طويل واستمراريه والمعلن الغير ناجح معندوش نفس طويل لكل ده، من الاخر المعلن الغير ناجح بيكون ماشى بالحب ومفيش خطوات من البدايه للنهايه والتصرف الصحيح لكل نتيجه هتطلع والموضوع مش ماشى بالتجارب زى اللى العلماء بيعملوها وع اساس النتايج بيحدووا الخطوات اللى بعدها.

لو قلتلك انى هديلك كل خطوه لكل احتماليه ممكن تحصل هبقى بكدب عليك - لكن اللى هعلمهولك هو انك ازاى تعمل التجارب المدروسه ده وازاى تدون النتايج وتقراها وازاى من خلال قرايتك للنتايج ده تحدد الخطوه اللى بعدها، فحتى لو عدد الاحتمالات اللى هتطلع بالملايين فانت هتعرف هتتصرف ازاى لانك هتعرف البروسيس.

المعلن الناجح هو عكس كل حاجه فوق عشان معدش واكرر ف الكلام بدون داعى - لو عندك اى عرض م اللى فوق ده غالبا حصل بسبب اللى وهمك ان بيلمس الdashboard ويطلع دهب من اول يوم - متصدقش كل اللى بتشوفه  الداتا والارقام هى كل حاجه لانها بتكون مجرده م العواطف واحساسك ومودك يعنى الارقام مبتتأثرش بالكلام ده كله فلما تبقى تمسك كل حاجه ف البزنس وتبصلها كارقام وحقايق وداتا هتعرف تاخد خطوات صح ف الاعلانات او البزنس ككل فحاول تاخد نفس المبادىء هنا وتطبقها ف بقية البزنس بتاعك وهتشوف فرق كبير ف طريقة اتخاذك للقرارات بتاعتك.

ف الكورس ده هنركن احساسنا ع جنب وهنتكلم بلغه الارقام واللى الداتا بتقوله - احنا هنا علماء بنعمل تجارب علميه وبندون النتايج بتاعتها وبنقرأ النتايج وع اساساها بنحدد خطوتنا الجايه، الفيس بوك ده ف نظام عرضه للاعلانات بيعتمد ع نظام الauctions يعنى زى مزاد كده وبيخش فيه عوامل كتير جدا انا هشرحلك اهمهم واهم كرتين انت لو لعبت عليهم هتكسب ف معظم المزادات والفيس بوك هيكافئك بترافيك ارخص بكتير وتفاعل احسن وكوالتى احسن وهتلاقى حملاتك بتجيب نتايج احسن بكتير لو عرفت ازاى تكسب اكتر ف المزادات ده اللى بتخليك تكسب impressions اكتر لاعلاناتك بس الاول تعالو نخش المطبخ ونفهم كل حاجه، ونفهم هى الناس ده بتفكر ازاى وليه ف حسابات كتير بتتقفل من غير داعى واحيانا بتكون من غير ما تعمل حاجه غلط.

اولا لازم تعرف ان البلاتفورم ده بيعتمد اعتماد كبير جدا ع اللوغارتميات ف اتخاذ قرارات كتير منها مثلا قفل حساباتك لكن العكس مش صحيح يعنى عشان تفتح حسابك مره تانيه لازم بنى ادم هو اللى يقبل ده، اللوغارتميات ده متبرمجه ع Core Values وقواعد What If طيب يعنى ايه الكلام ده… تعالى نبسطه عشان نفهم اللوغارتميات ده لاننا لو فهمناها هنعرف ازاى نتفادها ونشتغل صح.

(قبل ما اقول اى حاجه: حابب انوه ان ده مش هيكون كافى بنسبه ١٠٠٪ انه ميقفلكش حساباتك لكنه هيساعدك كتير انك تتجنب معظم الاسباب اللى بتقفل الحسابات فهتزود فرص انك تشتغل بشكل منتظم)

نشرح بققى ايه قصه الCore Values ده - معناها بالمعنى البسيط ان ده المبادىء او القيم اللى ع اساساها اللوغارتميات ده هتبصلها لما تيجى تاخد اى قرارزى ما الدول والحكومات بتمشى بدستور بترجعله ف كل حاجه لما تاخد قرار مثلا - ده الدستور بتاع الفيس بوك اللى الفيس حطه للوغارتميات ده عشان تبصله قبل ما تاخد قرارات انا بقى هقلك ع اهم مادتين ف الدستور ده عشان تبقى عارفهم
الUser Experience - ده اهم حاجه عند الفيس بوك وهو الexperience اللى المستخدمين بيعيشوها اثناء تواجدهم ع الفيس بوك
الفيس بوك عايز الناس كلها تفضل قاعده ع الفيس بوك ومش عايزهم يطلعوا منه فاى حاجه ممكن تدايقهم هيحاول يتخلص منها عشان يفضل الفيس بوك بالنسبالهم هو المكان اللى بيقضوا فيه وقت ظريف من غير ما يشوفوا حاجه تدايقهم
طيب هل هما فعلا حققوا ده بنسبه ١٠٠٪؟ لا طبعا ومستحيل لكنهم كل يوم بياخدوا اجراءات ويطوروا ف اللوغارتميات بتاعتهم عشان يحسنوا الuser experience عشان كده مثلا ف اعلانات من سنين بخصوص التخسيس كانت مسموح بيها لكن دلوقتى اعلانات التخسيس بقت من اصعب الاعلانات اللى ممكن تتقبل - لان معظمها بيضر الuser experience.

طيب تانى حاجه هى انه بزنس ومحتاج فلوس عشان يفضل مكمل
معناها ايه؟ معناها انه محتاج معلنين يقدر يعتمد عليهم انهم يفضلوا يعلنوا عليه ويثق انهم مش هيأذوا الuser experience، اللى بيحصل اننا كمعلنين بيبقى اول اهتمامنا اننا نبيع المنتج او الخدمه بتاعتنا ومبيكونش ف اول اولوياتنا الuser experience والناس اللى هتقرا الاعلان هتحس بايه وهل ده ممكن ينفرهم م البلاتفورم ولا لا؟
عشان كده الفيس بوك عمال يطور كل شويه من الادوات اللى تساعدنا كمعلنين اننا نعرف الuser experience من خلال الrelevence score اللى اتغير دلوقتى لquality ranking - engagement rate ranking - conversion rate ranking.

طيب انت خضتنا كده انا مفروض اعمل ايه؟ انا مش عايزك تحمل هم حاجه - انا عايزك تفهم هما عايزين ايه بس وهعرفك ازاى توصلهم انك بتطبق كده بالطريقه اللى هما يفهموها واحنا قلنا الuser experience وانهم بزنس ومحتاجين معلنين موثوقين
تعالوا سريعا كده نبتديها ف البوست ده ونكملها ف البوست اللى جاى ازاى اننا نستغل ده لصالحنا بدل ما يكون ضدنا…
مش كده وبس - لا هخليك كمان تكسب بالكرتين دول ويكونوا من ضمن اسلحتك وانت بتنافس منافسينك لانهم مش عارفين ده
نمسك اول حاجه الuser experience - الفيس بوك عايز اعلاناتك تكون بتضيف value وافاده للمستخدمين بتوعهم
ممكن نطبق احنا الكلام ده ازاى؟

ممكن نعمل حاجات كتير يعنى مثلا العملاء اللى بتشترى منك ممكن تطلب منهم يسيبوا ليك ريفيوز ع الصفحه بتاعتك عشان ده هيخلى الفيس بوك يشوف انك معلن بيبيع منتجات مفيده للمستخدمين والمستخدمين بيسيبوا ليك ريفيوز كويسه ع الصفحه بتاعتك ويعملولك recommendation، طيب ممكن تعمل ايه تانى؟ ممكن تعمل retarget للناس اللى اشترت منك اصلا وعجبهم المنتج وتحطهم ف custom audience واللى هيحصل بشكل تلقائى انهم لما هيشوفوا اعلانك تانى هيسيبولك كومنتات من هذا القبيل: "اه ناس محترمه اشتريت منهم وعجبنى المنتج" وهيسيبولك كومنتات ايجابيه ع اعلاناتك بشكل تلقائى من غير ما تطلب.

(شفت بقى فكرة ان المنتج والعميل بتاعك يكون اول اولويه هيترتب عليه كل حاجه ازاى لان العميل بتاعك هيكون من ضمن اسلحتك وانت بتنافس وعايز تكسب ف نظام الauctions بتاع الفيس بوك)، ايه تانى ممكن يساعدك؟ سرعة ردك ع الرسايل اللى بتجيلك ع الصفحه؟ ليه لان كل ما بترد بسرعه معناها انك مهتم بالعميل بتاعك اللى هو ف الاصل مستخدم للفيس بوك يعنى بيشوفوا انك مهتم بالuser experience - ايه ده هو الفيس بوك بيبص ع الحاجات ده كلها فعلا؟

كويس انك عرفت عشان تبدأ تهتم - الفيس بوك كمان بيظهر معدل سرعه الرد ع الرسايل للمستخدمين فده هينفعك لما تكون بترد بسرعه هيشجع الناس اللى هتفكر تستفسر عشان هتشوف انك بترد بسرعه

يبقى احنا قلنا دلوقتى ٣ حاجات
  • إعمل  عمل ريتارجت للعملاء اللى مبسوطين منك واشتروا منك لاعلاناتك عشان يعملوا كومنتات ويشكروا فيك وده هيحصل بشكل تلقائى من غير حتى ما تطلب.
  • اطلب من العملاء بتوعك يسيبولك ريفيو ع الصفحه بتاعتك ويحكوا عن التجربه الشرائيه بتاعتهم معاك
  • رد ع الرسايل اللى ع الصفحه بسرعه

ايه ده يعنى الحاجات ده لو عملتها هتحسن نتايج اعلاناتى؟ مليون ف الميه ومش كده وبس - ده هتقوى موقفك كده لو حسابك اشتبه فيه واتقفل بالغلط وهتعرف ترجعه وهتظهر بصوره معلن بيهتم بالعملاء بتوعه - الفيس بوك بيبص ع كل حاجه فاحرص انك تظهر ف احسن صورك، تانى حاجه بخصوص ان الفيس بوك بزنس يعنى محتاج معلنين يقدر يثق فيهم انهم يفضلوا يعلنوا ويدفعوله فلوس عشان يقدر يكمل، ده هتيجى ف المرتبه التانيه - طيب ليه؟ لانها لو حصل وتعارضت مع user experience، الuser experience هى اللى هتكسب يعنى لو الفلوس اتحطت ف كفه والexperience بتاعت المستخدم بتاعتهم فكفه فالـexperience هى اللى هتكسب ١٠٠٪.

ف ناس هتقلك سيبك م الكلام ده هما عايزين يلموا فلوس - منصحكش انك تجرب حظك لانى شفت بنفسى حسابات بتصرف ارقام ضخمه واتقفلت - الفيس معندوش تهاون مع الuser experience ومش هيرجحوا كفه الفلوس ابداااااا ع حساب المستخدم بتاعهم
بس مع ذلك هما بزنس يعنى محتاجين معلن يقدروا يثقوا فيه انه يفضل يعلن ويدفعلهم فلوس.

يبقى احنا الاول لازم نشوف يعنى ايه معلن يقدروا يثقوا فيه وخصائص وصفات المعلن ده عشان نعرف نبقى زيه وناخد نفس المسار
المعلن اللى بيقدروا يثقوا فيه هو مش مجرد معلن - هو وراه بزنس هو كمان والاعلانات جزء مهم من البزنس بتاعه، وعشان نقدر نشرح الكلام ده بشكل عملى اكتر لازم نفسر المعلن اللى الفيس بوك بيثق فيه بيعمل ايه؟ بيعمل حملاته ازاى؟ بيدير حساباته ازاى؟ بياناته شكلها عامل ازاى؟ وازاى الفيس بوك مبرمبج اللوغارتميات مثلا انك لو بتبيع كورسات وعنده معلنين قدام بيثق فيهم بيبعوا كورسات مثلا بيشوف كل حاجه هما بيعملوها وازاى بيعملوها وبيبدأ يقارنك بيهم ولو لقاك مش ماشى زيهم او مش واخد نفس الpattern غالبا اللوغارتميات بتشك فيك وممكن تقفلك الحساب وده اللى بيخلى ناس كتير ممكن متكونش غلطت بس مجرد انها مش عارفه الpatterns اللى الفيس بوك بيدور عليه عشان يثق فيك وبيبقى صعب انك ترجع الحساب لان الموضوع لازم يتم عن طريق موظفين من الreviewal team.


وده اللى هنكمله ان شاء الله ف الدرس الجاى - هعرفك الانماط اللى الفيس بوك بيدور عليها عشان تخليه يثق فيك بسرعه وتظهر قصاده ف صوره المعلن اللى يقدر يثق فيه ويعتمد عليه انه يفضل يعلن ع الفيس بوك وده هينتج عنه انه هتكسب مزادات اكتر فالauctions يعنى اعلانات ارخص ونتايج اعلانات احسن، نتايج اعلانات احسن؟ ايه ده يعنى هو انا ممكن اعمل حمله ف حساب وتكسب معايا وتجيب نتايج كويسه واجى انقلها كلها لحساب تانى ومتشتغلش؟ اه جدااا
يعنى الانماط والuser experience واللى بتقوله فوق ده اللى بيساهم ف كل ده؟ بالظبط كده!
هل هما الاتنين دول بس اللى بيأثروا؟ لا ف عوامل تانيه وهنتطرق ليها سريعا ف البوست اللى جاى بردو بس بعد ما نكمل شرح النقطتين الاولايين دول لانهم اهم اتنين وهعرفك الباقى وازاى بردو تستفاد منه .

كمل معايا ف الدرس الجاى عشان تعرف نكمل شرح تانى نقطه اللى هى ازاى تبقى معلن الفيس بوك يقدر يثق فيه ووازاى تفهم الانماط اللى الفيس بوك بيبص ليها لما ييجى يحدد مدى ثقته فيك وف حساباتك الاعلانيه
نشوفكم باذن الله ف الدرس الجاى
هل اعجبك الموضوع :

تعليقات

العناوين الموجودة داخل الموضوع